Poppo ban Pappa

Ngoja se Juba'

Bhungkana Geddhang

Man Dirman ban Man Sa'man ampon toju' sepa' e barungnga Bun Sirbhati. Kopi ban roko' daddi gu'ganggu'na tor-catoran. Lakar ta' nemmo mare bila pon alonggu e barung kopi. Sadajana peristiwa e alam dunnya daddi careta se ta' potos-potos.

Barung kopi bisa daddi sae ban amanfaat, bila napa se daddi parembhagan andi' nilai se sae. Sabalig epon, bila ta' sae bisa daddi parcoma apol-kompol e barung kopi.

"Man, mon lamba' se anyama na'-kana' keni' bila la cengkal otaba ta' toro' oca' ka oreng towana, biasana epokol otaba epoppo..."

"Iya, Dir... Ngko' bai lamba' cengkal ka oreng towa, langsung engala'agi pappa, pas epoppo ngko' ban oreng towa."

"Iya pada Man, jamanna ngko' ban ba'na reya ta' pada ban jaman sateya. Mon sateya, bannya' emanja ban etorot mana na'-kana'na mon cengkal."

"Apapole mon e sakola'an, Dir... Banni pera' gun epoppo ban guru. E okom kalaban okoman se berra'."

"Sateya Man, tako' kabbi se moppowa otaba mokolla na'-kana' cengkal. Arapa polana, tako' elaporragi ka polisi."

"Padahal ya Dir, epoppo, epokol, otaba eberri' okoman rowa banni niat nyake'na na'-kana', tape baramma sopaja tengkana se ta' bendher bisa aoba ka bendher. Artena, okoman rowa pada ban ngoja setan se aganggu manossa."

"Iya rowa, Man... Keng jhat emo' onggu mon sateya. Ambhu ngastete ban mikker dukale se aberri'a okoman ka na'-kana'."

Kaodi'an panika lakar teros apoter noro'e jaman se ajalan. Jaman panika emodella kadinapa, agumantong ka manossana bang-sebang.

Abali ka napa se ebahas Man Dirman ban Man Sa'man, se abahas epoppo ban pappa. Saongguna panika aropa okoman ka se sala otaba ta' sae. Otamana tengka ghuli ban adab se bada e manossa.

Poppo panika pada ban mokol, seddengan pappa panika dari ranca'na otaba tolangnga daun geddhang. Bisa epoppo kalaban konco'na ban bisa kalaban bhungkella.

Moppo paggun ta' sae bila e ka niat nyake'en otaba nyeksa. Sabab, nyake'en otaba nyeksa panika lakar banni cara tong-settongnga se bisa ngoba se ta' sae. (Ack)