Buku ban Ketab

Oca' ban Tengka

Koleksi Buku

Dalem kaodi'an e dunnya, biasana ta' lopot dari pan-saponapan se ejarba'agi dalem buku ban ketab. Buku ban ketab aropa tolesan se agandu' arte tor makna ka angguy sadajana manussa.

Buku ban ketab aesse pangajaran se aropa elmo pangaonengan. Buku biasana bannya' ebahas e sakola'an-sakola'an ban kannengan pendidikan. Seddengan ketab, bannya' e madrasah-madrasah, ponduk, pangajian, kompolan, ban sa macemma.

Man Dirman ban Man Sa'man se biasa ngopi e barungnga Bun Sirbhati e partelon kampong, kateppa'an abahas masalah buku ban ketab. Menorot se kaduwa, buku ban ketab ta' pada ban laen pamahaman.

"Man, ba'na lamba' bakto a sakola, lebur ka buku apa...!" Can Man Dirman.

"Mon Ngko', Dir... Lamba' lebur ban senneng ka buku careta." Jawab Man Sa'man.

"Berarti, ta' lebur ka buku pangajaran sakale, Man!" Atanya pole Man Dirman.

"Banni enga' jia, Dir... Keng neng-sennenganna Ngko', ya ka buku careta." Jawab Man Sa'man.

Kabada'an barung molae bannya' se kaloar ban mangkat ka kalakowanna bang-sebang. Man Dirman ban Man Sa'man gi' paggun ngopi kaduwa'an.

"Man, apa bhidana buku ban ketab...?"

"Ya paggun ta' pada, Dir."

"Baramma maksodta, Man!"

"Ongguna buku ban ketab reya pada Dir, pada tolesan ban baca'an. Keng, se ma laen gun kannenganna. Mon buku, biasana bannya' e sakola'an, kantor, ban sa macemma. Mon ketab, bannya' e madrasah, ponduk, pangajian, ban sa macemma."

"Mon e pa buru ka pamahaman laen, baramma Man...!"

"Pamahaman laen se baramma, logika, filsafat, apa tasawuf, Dir...?"

"Ya, sa macem ganiko pon..."

"Oooo, mon Ngko', buku reya urusan dunnya' ban ketab urusan akherat. Maksodta, buku bannya' ebaca ka angguy aba' sopaja penter ban faham kaodi'an. Mon ketab kabannya'an sopaja aba' faham agama ban akherat bisa salamet."

Man Sa'man lakar penter mon esoro abahas cem-macemma persoalan. Buku ban ketab e koasaen kabbi. Man Dirman ta' baba mon ka Man Sa'man, sanajjan Man Sa'man orengnga santai ban ta' gawat sakale abasna.

Pabannya' maca buku ban pabannya' ngaji ketab, soapaja aba' sadajana salamet e dunnya ban akherat. 

"Tape, Dir... Buku ban ketab reya banni gun pera' oca' otaba ebaca maloloh otaba gun ngedingagi maloloh. Buku ban ketab reya baramma se buruwa ka tengka ban adab Ngko ban Ba'na Dir..." Man Sa'man a caramah.

"Kodu mon jiah Man, sabab tengka ban adab reya se sangat penting dari ollena buku ban ketab." Jawab Man Dirman.

"Enga' guru, baramma daddi conto ka moredta, kyae daddi conto ka santre ban masyarakat, ban oreng towa daddi conto ka na' potona. Conto se bagus, se sae, se molja, ban paraddhu ka Pangeran." Man Sa'man nambai.

Daddi buku ban ketab reya bisa daddi oca' ban tengka se bagus ban mabagus aba'na dibi, bi-lebbi ka oreng laen. (Ack)