Karjana Muslimatan

Rombongan Asaragam

Marhaban ya Rabi'ul Awwal

Bila ampon dapa' ka bulan Molod, e man-dimman tempat paggun ramme ban enger kalaban monyina mercon, sound, konvoi, ban laen epon.

Acara molotan, molae dari roma'an, pong-kampong, disa, ban sampe kotta bannya' seabada molotan. Lakar masyarakat panika semangat onggu bila ampon dapa' la bulan-bulan se agung dalam agama Islam.

Namong, bada se ta' biasa monggu catorra Man Dirman ban Man Sa'man neng e barung kopina Bun Sirbhati. Lakar se kaduwa panika lebur acator se ta' biasa e dalem kaodi'na manossa. Kong-langkong kaodi'an sosial masyarakat e disa otaba pong-kampong.

"Man, dhika bannya' olle undangan molotan...?"

"Bah iya, Dir... Possa' lajuh Dir, bada se roma'an, langgaran, kompolan, ban masjid."

"Nyaman ya Man, Bun depor ta' osa amassa'..."

"Iya, nyaman keya..."

Lakar se anyama berkat ban wa'-buwa'an nabuy e bulan Molod. Se ajhuwal wa'-buwa'an atellasan. Se grup hadrah ban banjari atellasan keya, ban para pencaramah atellasan keya, asabab bannya' onjangan le-ngalle kannengan.

"Dir, molotan reya ongghuna banni jhung-jhungan ban nas-panasan. Sanajjan paggun olle ganjaran sanajjan riya', tape jereya ta' bagus ka tengka ghuli manossa." Man Sa'man ampon acaramah.

Elmona molotan panika ta' jhau dari elmo syafaat ban barokah. Banni gun bang-tabangan nyare berkat ban addhuwan ramme. Sampe'-sampe' bada se bat-talebat mabada molotan alias ta' kapra sakale.

"Dir, ba'na tao, bila molotan reya, mon muslimatan lebur ongghu. Acem-macem saragamma ban angguyya. Bila mangkat ka man-dimman masjid rombongan nompa' pikep ban mobil."

"Iya, Man.... Taneyanna masjid ban mushola paste possa' ban muslimatan. Mon se asongko'an kenneng bitong se dateng."

"Ya rowa, Dir... Acora' la daddi budaja ban kabiasa'an bila Molotan ban Isra' Mi'raj. Acara pangajian daddi karjana muslimatan se gante entaren dari tempat settong ka tempat laenna."

Namong se earep, samoga'a daddiya ban olleya barokah tor ridhana Pangeran. Kong-langkong bisa olle syafaatta Kanjeng Nabi Muhammad SAW. (Ack)